Пирĕн çĕр-шывра кăçал пĕрремĕш хут апрелĕн 21-мĕшĕнче Вырăнти хăй тытăмлăх кунне паллă тунă. Çакна халалласа Шупашкарта апрелĕн 19-мĕшĕнче ЧР Муниципаллă пĕрлешĕвĕсен Канашĕн пиллĕкмĕш съезчĕ иртнĕ, унăн ĕçне республика Пуçлăхĕ Михаил Игнатьев та хутшăннă.

Чăваш патшалăх академии драма театрĕнче иртнĕ пĕлтерĕшлĕ мероприятие пирĕн район делегацийĕ те хутшăннă, вăл шутра – район пуçлăхĕ Александр Степанов, район администрацийĕн пуçлăхĕ Александр Башкиров, ял тăрăхĕсен пуçлăхĕсем тата специалистсем.

Съезда пухăннисем муниципаллă пĕрлешÿсен социаллă экономика пурнăçĕпе, районсенче çур аки ĕçĕсем еплерех пынипе паллашнă, вырăнти хăй тытăмлăх органĕсен малашлăх планĕсене палăртнă.

Çавăн пекех ларура патшалăх наградисене, тав çырăвĕсене панă, тĕрлĕ конкурссен çĕнтерÿçисене саламланă. Палăртма кăмăллă, пирĕн районти Пантьăк ял тăрăхĕн администрацийĕн ертсе пыракан специалист-эксперчĕ Валентина Жижайкина нумай çул хушши тÿрĕ кăмăлпа ĕçленĕшĕн республика Пуçлăхĕн Михаил Игнатьевăн Тав çырăвне тивĕçнĕ.

ЧР Патшалăх Канашĕн Патшалăх строительствин, вырăнти хăй тытăмлăх, регламентпа депутат этикин комитечĕн председателĕ Николай Малов вара вырăнти хăй тытăмлăха аталантарас ĕçе пысăк тÿпе хывнăшăн Ачкасси ял тăрăхĕн пуçлăхне Игорь Герасимова, Хусанушкăнь ял тăрăхĕн пуçлăхне Любовь Кузнецована, Атнар ял тăрăхĕн пуçлăхĕн çумне Альбина Наумована Тав çырăвĕсем парса чысланă. Район пурнăçне активлă хутшăннăшăн "Единая Россия" партин Тав çырăвĕсене Ачкасси ял тăрăхĕн ертсе пыракан специалист-эксперчĕ Николай Мидушкин, Хусанушкăнь ял тăрăхĕн муниципаллă служба ветеранĕ Ольга Сергеева, район администрацийĕн йĕркелÿпе тĕрĕслев тата кадр ĕçĕсен секторĕн заведующийĕ Светлана Князькова тивĕçнĕ.

А.ТИМОФЕЕВА.