Районта пурăнакансем йĕлтĕр спортне кăмăллани юлашки вăхăтра ытларах та ытларах палăрать. Çакна мартăн 15-мĕшĕнче Ишеккасси çывăхĕнчи вăрманта иртнĕ йĕлтĕр ăмăртăвĕ те кăтартса пачĕ. Йĕлтĕрçĕсем йĕпе юрпа çумăр çунине пăхмасăр старта тухрĕç.

Чăваш Республикин Патшалăх Канашĕн депутачĕн Валерий Павловăн парнисене çĕнсе илессишĕн пынă ăмăрту хĕрÿ иртрĕ, старта Етĕрне районĕн спортсменĕсем те тăни тупăшăва татах çивĕчлетрĕ. Пухăннисене район пуçлăхĕ Александр Степанов тата район администрацийĕн пуçлăхĕ Александр Башкиров саламларĕç, спортсменсене ăнăçу сунчĕç.

Депутат парнисемшĕн пынă ăмăртăва чи малтанах шкул ачисем хутшăнчĕç.

1999 çулта тата ун хыççăн çуралнă арçын ачасем хушшинче Алексей Дадюкова (Хĕрлĕ Чутай шкулĕ) çитекенни пулмарĕ, çак ÿсĕмри хĕр ачасем хушшинче пĕрремĕш вырăна Анна Федорова (Етĕрне районĕ) тухрĕ.

1997-1998 çулсенче çуралнисем хушшинче пĕрремĕш вырăна Василий Вазин (Питĕркасси шкулĕ) тата Вероника Егорова (Çĕн Атикасси шкулĕ) тухрĕç.

1995-1996 çулсенче çуралнисенчен Андрей Петрейкинпа (Çĕн Атикасси шкулĕ) Эльвира Андреевана (Çĕн Атикасси шкулĕ) çитекенни пулмарĕ.

Унтан старта аслисем тухрĕç.

18-29 çулхи хĕрсем хушшинче Алиса Сухарева (райпо) мала тухрĕ, каччăсенчен – Иван Бармин (Кив Атикасси ял тăрăхĕ).

30-39 çулхисем хушшинче хĕрарăмсенчен чи маттурри Надежда Соколова (райпо) пулчĕ, арçынсенчен – Дмитрий Волков (райпо).

40-49 çулхисем хушшинче хĕрарăмсенчен Галина Волкована (райпо), арçынсенчен Владимир Михуткина ("Ростелеком" УАО-н районти çыхăну узелĕ) çитекенни пулмарĕ.

50-59 çулхи хĕрарăмсем те маттур чупрĕç, кунта Римма Вазякова (Мишеркасси шкулĕ) çĕнтерчĕ, арçынсенчен – Владимир Элеменкин ("Хастар" ФСК).

60 çултан аслăрах спортсменсем хушшинче Людмила Михуткинапа ("Хастар" ФСК) Валерий Сатлайкин палăрчĕç.

Ăмăртура малти вырăнсене йышăннисем пурте дипломсемпе пылак парнесене тивĕçрĕç.

Источник: "Пирěн пурнăç"