Пирĕн районти кире пуканне çĕклекен спортсменсем тĕрлĕ ăмăртусене хутшăнса малти вырăнсене йышăнни савăнтарать. Акă нумаях пулмасть Елчĕкре ЧР Патшалăх Канашĕн Председателĕн, РФ спорт мастерĕн Юрий Поповăн кубокне çĕнсе илессишĕн кире пуканне çĕклекенсем хушшинче республика шайĕнчи иккĕмĕш турнир иртнĕ. Унта республикăн пур кĕтесĕсенчен тата кÿршĕ регионсенчен пухăннă атлетсем вăй виçнĕ.

Палăртма кăмăллă, çак ăмăртура пирĕн районти виçĕ спортсмен малти вырăнсене тухма пултарнă. 1994-1997 çулсенче çуралнисем (85 килограмм ытла таяканнисем) хушшинче Ачкассинче çуралса ÿснĕ, халĕ Чăваш патшалăх ял хуçалăх академийĕнче вĕренекен Дмитрий Козлов иккĕмĕш вырăн йышăннă. 1954-1963 çулсенче çуралнисем хушшинче "Хастар" спорт комплексĕн тренерĕ, спорт мастерĕ Юрий Бронюков пĕрремĕш вырăна тухнă.

1944-1953 çулсенче çуралнисем хушшинче вара район больницин педиатрĕ, спорт мастерĕ Владимир Ульянов 16 килограмлă кире пуканĕсене йăтса пĕрремĕш вырăн йышăннă. Çавăн пекех Владимир Петровича абсолютлă виçе категорийĕнче мала тухнăшăн микрохумлă кăмака парнелесе чысланă.

Хамăр район арçыннисене кире пуканĕсене мамăк евĕр çĕклесе асăннă ăмăртуран сумлă кăтартусемпе, дипломсемпе тата парнесемпе таврăннă ятпа саламлатпăр, спортра çитĕнÿ хыççăн çитĕнÿ тума сунатпăр.