Çак сăн ÿкерчĕкре эсир Утаркасси ялĕнче пурăнакан Порфирьевсен çемйине куратăр. Вĕсем – пирĕн районтан "Çулталăк çемйи – 2012" республика конкурсне хутшăнма тивĕçлĕ пулнă çемье. Эрне кун Порфирьевсем конкурсăн финалĕнче пулнă, парнесене тивĕçнĕ.

Сăмах май, Ольгăпа Алексей Порфирьевсем 16 çул пĕр-пĕринпе килĕштерсе пурăнаççĕ. Ольга Дмитриевна – Мишеркассинчи Культура çурчĕн директорĕ, Алексей Юрьевич – райадминистрацин вĕренÿ пайне ертсе пырать. Мăшăр икĕ ывăл ÿстерет. Асли – Юрий – Хĕрлĕ Чутай шкулĕнче 10-мĕш класра вĕренет, физикăпа тата компьютер программисемпе интересленет. Кĕçĕнни – Евгений, Мишеркасси шкулĕнче 3-мĕш класра ăс пухать, спортпа туслă.

Порфирьевсем ял-йышра ĕçчен те сăпайлă, ырă çынсем пулнипе, обществăлла пурнăçа активлă хутшăннипе палăрса тăраççĕ. Капмар кил-çурт хăпартни, хушма хуçалăха аталантарса пыни, хурт-хăмăр ĕрчетни, юрă-ташăра ăста пулни те çакна аван çирĕплетсе парать.