Декабрĕн 26-мĕшĕнче Мускаври Кремльте Çĕнĕ çул елки иртĕ. Уява ачасене Раççейĕн пĕтĕм кĕтессинчен пухĕç. Çĕнĕ çул уявĕн программи, чăн та, пуян пулĕ: ачасем Мускаври театрсене, музейсене, истори палăкĕсене кайса курĕç. Хĕрлĕ лапамра, пĕлтĕрхи пекех, коток уçăлĕ. Унта конькипе ярăнма кăмăллакансем пурте мастер-класс илме пултарĕç, Олимп вăййисен чемпионĕсемпе тата паллă фигуристсемпе тĕл пулĕç.

Чăваш Республикинчи ача-пăча делегацийĕ йышĕнче пирĕн районти Анна Инжебейкина пур. Социаллă хÿтлĕх пайĕн начальникĕ Вера Ярабаева палăртнă тăрăх кăçалхи уява тата Раççей Президентне курма Анна чăнах та тивĕç. Вăл Шулюри тĕп шкулта 6-мĕш класра вĕренет, сахал тупăшлă çемьере ÿсет пулин те унăн тавра курăмĕ пуян: районти, республикăри мероприятисене, конкурссене, спорт ăмăртăвĕсене хаваспах хутшăнать, парнесене тата грамотăсене тивĕçет, вĕренÿре те тăрăшать.