Октябрь пуçламăшĕнче Шупашкарта ачасемпе çамрăксен пултарулăхĕн "Ылтăн кĕркунне" тăваттăмĕш фестиваль-конкурс иртнĕ. Унта тĕрлĕ номинацире 500 ытла ача тупăшнă.

Хĕрлĕ Чутайри ачасен искусство шкулне çÿрекен 13 çулхи Инна Крыцовапа 7 çулхи Анна Иванова та Раççей шайĕнчи асăннă конкурса хутшăннă, унта хăйсен тăварлă чустаран тунă ĕçĕсене тăратнă. Иннăн "Чей валли" тата Аннăн "Хурт-тусăм" ĕçĕсем иккĕмĕш вырăна тухма пултарнă. Палăртмалла, ачасене тĕрлĕ тĕслĕ тата тĕссĕр тăварлă чустаран тем те пĕр ăсталама вĕрентекенĕ – Л.Г.Индрякова.

Маттур хĕр ачасем фестиваль-конкурс асра юлмалла иртнине, вĕсен кăмăлне хускатнине палăртаççĕ. Вĕсем малалла та тĕрлĕ конкурссене хутшăнас шухăшлă.