Сентябрĕн 15-мĕшĕнче Шупашкарта "Олимпийский" стадионта "Советская Чувашия" хаçат парнисене çĕнсе илессишĕн прессăн спорт фестивалĕ – А.Г.Николаев летчик-космонавта асăнса 74-мĕш çăмăл атлетика эстафета чупăвĕ иртрĕ.

Спорт уявне Республика Пуçлăхĕ Михаил Игнатьев тата нумаях пулмасть Лондонра иртнĕ Паралимпиадăн виçĕ хут чемпионки Елена Иванова хутшăнчĕç.

Кăçал старта тухнă 346 ушкăн хушшинче пирĕн районти çак спортсменсем пулчĕç: район администрацийĕнчен, район хаçачĕн редакцийĕнчен, Хĕрлĕ Чутай салинчи Дадюковсен çемйи, Штанаш, Çĕн Атикасси, Атнар шкулĕсенчен...

Палăртмалла, район администрацийĕн пилĕк çынран тăракан ушкăнĕ вырăнти хăй тытăмлăх ушкăнĕсем хушшинче финиша чи пĕрремĕш парăнтарса малти вырăна тухма пултарчĕ, прессăн спорт фестивалĕн Кубокне тивĕçрĕ.

Ыттисем те ăмăртăва чыслăн хутшăнса хăйсем спортпа туслă пулнине, сывă пурнăç йĕркине пăхăнса пынине кăтартрĕç.

Сăмах май

Çăмăл атлетикăна кăмăллакансене çитес вăхăтра, сентябрĕн 23-мĕшĕнче, тата тепĕр ăмăрту кĕтет. Вырсарни кун Хĕрлĕ Чутайри Тĕп стадионта "Нацисен кросĕ" иртĕ, вăл 11 сехет те 30 минутра пуçланĕ. Ку ăмăртăвăн хăйне евĕрлĕхĕ пур – вăл пĕр вăхăтрах пĕтĕм Раççейĕпех иртĕ. "Нацисен кросне" спорта кăмăллакан пур çын та хутшăнма пултарать.