Çĕн Атикасси ялĕнче пурăнакан Елизавета Емельянова хăйĕн пурнăçне ачасене тарăн пĕлÿпе тĕрĕс воспитани парассипе çыхăнтарнă. Карăкçырми хĕрĕ Хĕрлĕ Чутайри вăтам шкултан вĕренсе тухсан педагогика институтĕнче пĕлÿ илнĕ те Çĕн Атикасси шкулĕнче ĕçлеме пуçланă. Хĕрĕх çула яхăн химипе биологи предмечĕсене вĕрентнĕ. Тÿрĕ кăмăлпа ĕçленĕшĕн вăл "РСФСР-ăн халăха вĕрентес ĕç отличникĕ" паллăна тивĕçнĕ.

Халĕ ĕç ветеранĕ тивĕçлĕ канура. Сакăр вунă çула çывхаракан хĕрарăм пĕчченех пурăнать. Шел те, мăшăрĕ виçĕ çул каялла çĕре кĕнĕ. Елизавета Филипповнан ачисем тăван килтен аякра тĕпленнĕ, анчах та амăшне манмаççĕ, май пур таран килсех тăраççĕ. Сакăр мăнукĕпе тăватă кĕçĕн мăнукĕ – ватăн чун канăçĕ.

Çак кунсенче Елизавета Филипповнапа тĕл пулпа тÿр килчĕ, вăл район хаçатне юратса вуланине, юн куна тата шăмат куна чăтăмсăррăн кĕтнине пĕлтерчĕ:

– Райхаçата вулама питĕ интереслĕ, темĕнле тема та хускататăр. Апат пĕçерме те вĕрентетĕр, пурнăçа вĕрентни те пур. Шухăша яракан статьясем пичетленни те аван. Эпĕ çынсене те район хаçатне çырăнма сĕнетĕп. Хаçат вуласан чун уçăлать.

Район хаçатĕнче пичетленнĕ сăн ÿкерчĕксемпе материалсенче тăванĕсем пирки пĕлнине палăртрĕ Елизавета Филипповна:

– "Кивĕ сăн ÿкерчĕк" фотоконкурсра сентябрĕн 22-мĕшĕнче пичетленнĕ Питĕркассинчи В.П.Фондеркин сăн ÿкерчĕкĕнче эпĕ мăнака палласа илтĕм. Вăл – Елена Григорьевна Мерескина, Березовка ялĕнче пурăннăскер, пуçламăш классене вĕрентсе. Елена Григорьевна Мускавра Надежда Крупская патĕнче пулнине каласа кăтартнине те астăватăп.

Ю.Григорьевский çырнă "Пирĕн те вĕсене манмалла мар" статьяна вуласан вара эпĕ вăрçăра пуçне хунă аттен шăллĕн Николай Капитонович Наштыковăн вил тăприйĕ Ленинград облаçĕнчи Пискарев масарĕ çинче пулнине пĕлтĕм"...

Эпир Елизавета Филипповнана çывхарса килекен Пĕтĕм тĕнчери ваттисен кунĕ ячĕпе саламлатпăр, малашне те район хаçачĕпе интересленме, ăна вуласах тăма çирĕп сывлăх сунатпăр.