Атнар шкулĕнче математика предметне вĕрентекен Анна Лаврентьева Учитель кунĕнче "Раççей Федерацийĕн пĕтĕмĕшле вĕрентĕвĕн хисеплĕ ĕçченĕ" ята тивĕçрĕ. 36 çул хушши ачасене тивĕçлĕ пĕлÿ парас ĕçре тăрăшакан пĕрремĕш категориллĕ вĕрентекене шкулта та, ял-йышра та ырăпа кăна асăнаççĕ. Анна Прокопьевна ачасене математика вăрттăнлăхĕсене тарăннăн уçса пама тăрăшать, унăн вĕренекенĕсен патшалăх экзаменĕсенчи кăтартăвĕсем те пысăк. Кăçал та вăл ертсе пыракан класра – вун пĕрмĕшĕнче – вĕренекен ачасем экзаменсене ăнăçлă тытасса шанма пулать.

Хăйне ăс-тăн панă вĕрентекенсене яланах ырăпа асăнать Анна Прокопьевна. Тен, вĕсемех ăна хăйсен тĕслĕхĕпе педагог профессине суйласа илме пулăшнă.

Ачасене вĕрентес ĕçе чунĕпе парăннă учитель район, республика шайĕнче хисеп хучĕсене пĕрре мар тивĕçнĕ. Хальхинче Анна Лаврентьевана Раççей шайĕнчи хисеплĕ ятпа саламланă май ЧР юстици министрĕн çумĕ Ирина Семенова кăкăр çине çакмалли паллă парса чысларĕ.